Tere Baare Mein Jab Sochaa Nahiin Thaa
Main Tanhaa Thaa Magar Itanaa Nahiin Thaa

Terii Tasviir Se Karataa Thaa Baaten
Mere Kamare Mein Aaiinaa Nahiin Thaa

Bad Gayaa Thaa Pyaas Kaa Ehasaas Dariyaa Dekh Kar
Ham Palat Aaye Magar Paanii Ko Pyaasaa Dekh Kar

Ham Bhii Hain Shaayad Kisii Bhatakii Huii Kashtii Ke Log
Chiikhane Lagate Hain Khvaabon Mein Jaziiraa Dekha Kar

Bekhvaab Sa’aton Kaa Parastaar Kaun Hai
Itanii Udaas Raat Mein Bedaar Kaun Hai

Kis Ko Ye Fiqr Ke Qabiile Ko Kyaa Huaa
Sab Is Pe Lad Rahe Hain Ki Saradaar Kaun Hai

Taviil Sadiyon Ke Besadaa Manzaron Se Puuchho
Merii Tabaahii Kii Daastaan Pattharon Se Puuchho

Tumhaare Mahalon Kii Shaan-O-Shaukat Bhii Aarazii Hain
Hamaare Maazii Kaa Kyaa Huaa, Maqabaron Se Puuchho

Sar Jo Mahafuuz Hon Unake, To Ridaa Bhii Maangen
Haath Uthaane Kii Sakat Ho To Duaa Bhii Maangen

Abhii Zakhmon Kii Numaaish Kaa Hai Insaan Kaa Vajuud
Jism Ko Jism Banaalen To Qaabaa Bhii Maangen

Ek Tuutii Huii Zanjiir Kii Fariyaad Hain Ham
Aur Duniyaa Ye Samajhatii Hai Ke Aazaad Hain Ham

Kyon Hamen Log Samajhate Hain Yahaan Paradesii
Ik Muddat Se Isii Shahar Mein Aabaad Hain Ham

Charaag Apane Thakan Kii Koii Safaaii Na De
Vo Tiiragii Hai Ke Ab Khvaab Tak Dhikhaaii Na De

Bahut Sataate Hain Rishte Jo Tuut Jaate Hain
Khudaa Kisii Ko Bhii Taufiiq-E-Aashanaaii Na De