Mujhako Yaqiin Hai Sach Kahatii Thiin Jo Bhii Ammii Kahatii Thiin
Jab Mere Bachapan Ke Din The Chaand Mein Pariyaan Rahatii Thiin

Ik Ye Din Jab Apanon Ne Bhii Hamase Rishtaa Tod Liyaa
Ik Vo Din Din Jab Ped Kii Shaakhe,N Bojh Hamaaraa Sahatii Thiin

Dil Mein Mahak Rahen Hain Kisii Aarazuu Ke Phuul
Palakon Mein Khilane Vaale Hain Shaayad Lahuu Ke Phuul

Ab Tak Hai Koii Baat Mujhe Yaad Harf Harf
Ab Tak Main Chun Rahaa Huun Kisii Guftaguu Ke Phuul

Jaate Jaate Vo Mujhe Achchhii Nishaanii De Gayaa
Umr Bhar Doharaauungaa Aisii Kahanii De Gayaa

Us Se Main Kuchh Paa Sakuun Aisii Kahaan Ummiid Thii
Gam Bhii Vo Shaayad Baraa-E-Meharabaanii De Gayaa

Ye Tasallii Hai Ki Hain Naashaad Sab
Main Akelaa Hii Nahiin Barabaad Sab

[Tasallii= Satisfaction]

Kabhii Yuun Bhii To Ho
Dariyaa Kaa Saahil Ho
Puure Chaand Kii Raat Ho
Aur Tum Aao

Kabhii Yuun Bhii To Ho
Pariyon Kii Mahafil Ho
Koii Tumhaarii Baat Ho
Aur Tum Aao

Ye Din Bahaar Ke Ab Ke Bhii Raas Na Aa Sake
Ki Gunche Khil To Sake Khil Ke Muskuraa Na Sake

Merii Tabaahii Dil Par To Raham Khaa Na Sakii
Jo Raushanii Men Rahe Raushanii Ko Paa Na Sake

Soz-E-Gam Deke Mujhe Us Ne Ye Irshaad Kiyaa
Jaa Tujhe Kash-Ma-Kash-E-Dahar Se Aazaad Kiyaa

Vo Karen Bhii To Kin Alfaaz Men Teraa Shikavaa
Jin Ko Terii Nigaah-E-Lutf Ne Barbaad Kiyaa

Qadam Insaan Kaa Raah-E-Dahar Mein Tharraa Hii Jaataa Hai
Chale Kitanaa Hii Koii Bachake Thokar Khaa Hii Jaataa Hai

[Raah-E-Dahar=path Of Life]

Naqsh-E-Khayaal Dil Se Mitaayaa Nahiin Hanoz
Bedard Main Ne Tujhako Bhulaayaa Nahiin Hanoz

[Hanoz=as Yet/still]

Kyaa Hind Kaa Zindaan Kaanp Rahaa Guunj Rahii Hain Takbiiren
Uktaaye Hain Shaayad Kuchh Qaidii Aur Tod Rahe Hain Zanjiiren

[Zindaan=prison; Takbiiren=slogans]