Ashaar Mere Yuun To Zamaane Ke Liye Hain
Kuchh Sher Faqat Unako Sunaane Ke Liye Hain

Ab Ye Bhii Nahiin Thiik Ki Har Dard Mitaa Den
Kuchh Dard Kaleje Se Lagaane Ke Liye Hain

Jab Lage Zakhm To Qaatil Ko Duaa Dii Jaaye
Hai Yahii Rasm To Ye Rasm Uthaa Dii Jaaye

[Rasm = Custom/tradition]

Kaun Kahataa Hai Tujhe Main Ne Bhulaa Rakhaa Hai
Terii Yaadon Ko Kaleje Se Lagaa Rakhaa Hai

Lab Pe Aahen Bhii Nahiin Aankh Mein Aansuu Bhii Nahiin
Dil Ne Har Raaz Muhabbat Kaa Chhupaa Rakhaa Hai

Fursat-E-Kaar Faqat Chaar Ghadii Hai Yaaro
Ye Na Socho Ke Abhii Umr Padii Hai Yaaro

Apane Taariik Makaanon Se To Baahar Jhaanko
Zindagii Shammaa Liye Dar Pe Khadii Hai Yaaro

Subah Kii Aas Kisii Lamhe Jo Ghat Jaatii Hai
Zindagii Saham Ke Khvaabon Se Lipat Jaatii Hai

[Aas=hope; Lamhe=moment; Saham=scared]

Har Ek Ruuh Mein Ek Gam Chhupaa Lage Hai Mujhe
Ye Zindagii To Koii Bad-Duaa Lage Hai Mujhe

Jo Aansuu Mein Kabhii Raat Bhiig Jatii Hai
Bahut Qariib Vo Aavaaz-E-Paa Lage Hai Mujhe

Zamaanaa Aaj Nahiin Dagamagaa Ke Chalane Kaa
Sambhal Bhii Jaa Ki Abhii Vaqt Hai Sambhalane Kaa

Bahaar Aaye Chalii Jaaye Phir Chalii Aaye
Magar Ye Dard Kaa Mausam Nahiin Badalane Kaa

Tamaam Umr Azaabon Kaa Silasilaa To Rahaa
Ye Kam Nahiin Hamen Jiine Kaa Hausalaa To Rahaa

Guzar Hii Aaye Kisii Tarah Tere Diivaane
Qadam Qaadam Pe Koii Sakht Marhalaa To Rahaa

Subh Ke Dard Ko Raaton Kii Jalan Ko Bhuulen
Kisake Ghar Jaayen Ki Us Vaadaa-Shikan Ko Bhuulen

Aaj Tak Chot Dabaaye Nahiin Dabatii Dil Kii
Kis Tarah Us Sanam-E-Sangbadan Ko Bhuulen

Sau Chaand Bhii Chamakenge To Kyaa Baat Banegii
Tum Aaye To Is Raat Kii Auqaat Banegii

Un Se Yahii Kah Aaye Ki Ham Ab Na Milenge
Aakhir Koii Taqariib-E-Mulaaqaat Banegii