Ajab Apanaa Haal Hotaa Jo Visaal-E-Yaar Hotaa
Kabhii Jaan Sadaqe Hotii Kabhii Dil Nisaar Hotaa

Na Mazaa Hai Dushmanii Men Na Hai Lutf Dostii Men
Koii Gair Gair Hotaa Koii Yaar Yaar Hotaa

Rasm-E-Ulfat Sikha Gaya Koi
Dil Ki Duniya Pe Chha Gaya Koi

Taa Qayamat Kisi Tarah Na Bujhe
Aag Aisi Laga Gaya Koi

Dil Ko Kyaa Ho Gayaa Khudaa Jaane
Kyon Hai Aisaa Udaas Kyaa Jaane

Kah Diyaa Main Ne Haal-E-Dil Apanaa
Is Ko Tum Jaano Yaa Khudaa Jaane

Ye Jo Hai Hukm Mere Paas Na Aaye Koii
Is Liye Ruuth Rahe Hain Ki Manaaye Koii

Taak Men Hai Nigah-E-Shauq Khudaa Khair Kare
Saamane Se Mere Bachataa Huaa Jaaye Koii

Uzr Aane Mein Bhii Hai Aur Bulaate Bhii Nahiin
Baais-E-Tark-E-Mulaaqaat Bataate Bhii Nahiin

[Uzr=hesitate; Bais-E-Tark-E-Mulaqat=basis
For Terminating Acquaintanceship]

Unake Ek Jaan-Nisaar Ham Bhii Hain
Hain Jahaan Sau-Hazaar Ham Bhii Hain

Tum Bhii Bechain Ham Bhii Hain Bechain
Tum Bhii Ho Beqaraar Ham Bhii Hain

Tumhaare Khat Mein Nayaa Ik Salaam Kis Kaa Thaa
Na Thaa Raqiib To Aakhir Vo Naam Kis Kaa Thaa

Vo Qatl Kar Ke Har Kisii Se Puuchhate Hain
Ye Kaam Kis Ne Kiyaa Hai Ye Kaam Kis Kaa Thaa

Sitam Hii Karanaa Jafaa Hii Karanaa
Nigaah-E-Lutf Kabhii Na Karanaa
Tumhen Qasam Hai Hamaare Sar Kii
Hamaare Haq Mein Kamii Na Karanaa

Kahaan Kaa Aanaa Kahaan Kaa Jaanaa
Vo Jaante Hii Nahiin Ye Rasmen
Vahaan Hai Vaade Kii Bhii Ye Suurat
Kabhii To Karanaa Kabhii Na Karanaa

Ranj Kii Jab Guftaguu Hone Lagii
Aap Se Tum Tum Se Tuu Hone Lagii

Chaahiye Paigaamabar Dono Taraf
Lutf Kyaa Jab Duu-Ba-Duu Hone Lagii

Pukaaratii Hai Khaamoshii Merii Fugaan Kii Tarah
Nigaahen Kahataii Hain Sab Raaz-E-Dil Zubaan Kii Tarah

Jalaa Ke Daag-E-Muhabbat Ne Dil Ko Khaak Kiyaa
Bahaar Aaii Mere Baag Mein Khizaan Kii Tarah