Ye Mujh Se Puuchhiye Kyaa Justajuu Mein Lazzat Hai
Fazaa-E-Dahar Mein Tahaliil Ho Gayaa Huun Main

[Justajuu=search; Lazzat=taste; Dahar=world; Tahaliil=immersed]

Ye Ishq Ne Dekhaa Hai Ye Aql Se Pinhaan Hai
Qatare Mein Samandar Hai Zarre Mein Bayaabaan Hai

[Pinhaan = Hidden; Qataraa = Drop]
[Zarraa = Speck; Bayaabaan = Wilderness]

Paas-E-Adab Mein Josh-E-Tamannaa Liye Hue
Main Bhii Huun Ek Hubaab Mein Dariyaa Liye Hue

Rag-Rag Mein Aur Kuchh Na Rahaa Juz Khayaal-E-Dost
Us Shokh Ko Huun Aaj Saraapaa Liye Hue

Maujon Kaa Aks Hai Khat-E-Jaam-E-Sharaab Mein
Yaa Khuun Uchhal Rahaa Hai Rag-E-Maahataab Mein

Vo Maut Hai Ki Kahate Hain Jisako Sukuun Sab
Vo Ain Zindagii Hai Jo Hai Iztaraab Mein

Ik Aalam-E-Hairat Hai Fanaa Hai Na Baqaa Hai
Hairat Bhii Ye Hai Ki Kyaa Jaaniye Kyaa Hai

Sau Baar Jalaa Hai To Ye Sau Baar Banaa Hai
Ham Sokhtaa Jaanon Kaa Nasheman Bhii Balaa Hai

Khudaa Jaane Kahaan Hai ‘Asghar’-E-Diivaanaa Barason Se
Ki Us Ko Dhuundhate Hain Ka’abaa-O-Butakhaanaa Barason Se

Tadapanaa Hai Na Jalanaa Hai Na Jalakar Khaak Honaa Hai
Ye Kyon Soii Huii Hai Fitrat-E-Paravaanaa Barason Se

Ye Raaz Hai Merii Zindagii Kaa
Pahane Huye Huun Kafan Khudii Kaa

Phir Nashtar-E-Gam Se Chhedate Hain
Ik Tarz Hai Ye Bhii Dil Dahii Kaa