Vo Kahate Hain Ranjish Kii Baaten Bhulaa Den
Muhabbat Karen Khush Rahen Muskuraa Den

Javaanii Ho Gar Jaavidaanii To Yaa Rab
Terii Saadaa Duniyaa Ko Jannat Banaa Den

Kaam Aa Sakiin Na Apanii Vafaayen To Kyaa Karen
Ik Bevafaa Ko Bhuul Na Jaayen To Kyaa Karen

Mujh Ko Ye Etaraaf Duaaon Men Hai Asar
Jaaye Na Arsh Par Jo Duaayen To Kyaa Karen

Nikhat-E-Zulf Se Niindon Ko Basaa De Aakar
Merii Jaagii Huii Raaton Ko Sulaa De Aakar

[Nik_hat-E-Zulf=fragnance Of The Hair]

Main Aarazuu-E-Jaan Likhuun Yaa Jaan-E-Aarazuu
Tuu Hii Bataade Naaz Se Iimaan-E-Aarazuu

Iimaan-O-Jaan Nisaar Terii Ik Nigaah Par
Tuu Jaan-E-Aarazuu Hai Tuu Iimaan-E-Aarazuu

Har Ek Jalvaa-E-Rangiin Merii Nigaah Men Hai
Gam-E-Firaaq Kii Duniyaa Dil-E-Tabaah Men Hai

Kisii Kii Yaad-E-Karam Uf Are Ma’azallaah
Tabaah Hoke Bhii Zaalim Dil-E-Tabaah Men Hai

Ai Ishq Na Chhed Aa Aa Ke Hamen
Ham Bhuule Huon Ko Yaad Na Kar
Pahale Hii Bahut Naashad Hain Ham
Tuu Aur Hamen Naashaad Na Kar

Qismat Kaa Sitam Hii Kam Nahiin Kuchh
Ye Taazaa Sitam Ijaad Na Kar
Yuun Zulm Na Kar Bedaad Na Kar
Ai Ishq Hamen Barbaad Na Kar

Kisii Se Kabhii Dil Lagaayaa Na Thaa
Muhabbat Kaa Sadamaa Uthaayaa Na Thaa

Hasiinon Ke Rone Pe Hansate The Ham
Kabhii Ek Aansuu Bahaayaa Na Thaa