Huii Hai Shaam To Aankhon Men Bas Gayaa Phir Tuu
Kahaan Gayaa Hai Mere Shahar Ke Musaafir Tuu

Bahut Udaas Hai Ik Shakhs Tere Jaane Se
Jo Ho Sake To Chalaa Aa Usii Kii Khaatir Tuu

Saaqiyaa Ik Nazar Jaam Se Pahale Pahale
Ham Ko Jaanaa Hai Kahin Shaam Se Pahale Pahale

Khush Hua Ai Dil Ke Muhabbat To Nibhaa Di Tune
Log Ujad Jaate Hain Anjaam Se Pahale Pahale

Beniyaaz E Gam E Paimaan E Vafaa Ho Jaanaa
Tum Bhii Auron Kii Tarah Mujh Se Judaa Ho Jaanaa

Main Bhii Palakon Pe Sajaa Luungaa Lahuu Kii Buunden
Tum Bhii Paabastaa E Zanjiir E Hiinaa Ho Jaanaa

Tere Hote Hue Mahafil Mein Jalaate Hain Chiraag
Log Kyaa Saadaa Hain Suuraj Ko Dikhaate Hain Chiraag

Apanii Maharuumiyon Pe Sharmindaa Hain
Khud Nahiin Rakhate To Auron Ke Bujhaate Hain Chiraag

Ab Ke Tajdiid E Vafaa Kaa Nahiin Imkaan Jaanaan
Yaad Kyaa Tujh Ko Dilaayen Teraa Paimaan Jaanaan

[Tajdiid = Renewal; Imkaan = Possibility]
[Jaanaan=dear One/ Beloved; Paimaan = Promise]

Main To Aavaaraa Shaayar Huun Merii Kyaa Vaqa’at
Ek Do Giit Pareshaan Se Gaa Letaa Huun

Gahe Gahe Kisii Naakaam Sharaabii Kii Tarah
Ek Do Zahar Ke Saagar Bhii Chadhaa Letaa Huun

Jis Simt Bhii Dekhuun Nazar Aataa Hai Ke Tum Ho
Ai Jaan-E-Jahaan Ye Ko_ii Tum Saa Hai Ke Tum Ho

Ye Khvaab Hai Khushbuu Hai Ke Jhonkaa Hai Ke Pal Hai
Ye Dhundh Hai Baadal Hai Ke Saayaa Hai Ke Tum Ho

Badan Mein Aag Sii Cheharaa Gulaab Jaisaaa Hai
Ke Zahar-E-Gam Kaa Nashaa Bhii Sharaab Jaisaa Hai

Kahaan Vo Qurb Ke Ab To Ye Haal Hai Jaise
Tere Firaaq Kaa Aalam Bhii Khvaab Jaisaa Hai

Yeh Wafa To Oon Dino Ki Baat Hai *Faraz*,
Jub Makaan Kachey Or Log Sachey Hoa Karte The.

By Ahmed Faraz

Ye Tabiyat Hai To Khud Aazaar Ban Jaayenge Ham
Chaaraagar Royenge Aur Gam_khvaar Ban Jaayenge Ham

Ham Sar-E-Chaak-E-Vafaa Hain Aur Teraa Dast-E-Hunar
Jo Banaa Degaa Hamen Ai Yaar Ban Jaayenge Ham